11 апреля 2021

Альбина ЕГОРОВА, Чăваш Республикин Патшалăх Канашĕн Председателĕ:

‒ Паян эпир çакăн пек лару-тăрупа час-часах тĕл пулатпăр: çемьере ашшĕ-амăшĕ те чăваш чĕлхине пĕлеççĕ пулин те вĕсен ачисем чăвашла калаçмаççĕ. Чăваш Енре пурăнакансен 67 проценчĕ ‒ чăвашсем. Тăван чĕлхене, пирĕн йăла-йĕркесене тата культурăна упраса хăварас тесен хамăрăн ачасене чăвашла калаçма вĕрентмелле, чăвашла кĕнекесем вуламалла.

Апрелĕн 10-25-мĕшĕсенче Чăваш Республикин Патшалăх Канашĕн пуçарăвĕпе «Ачана чăвашла кĕнеке парнеле» ыр кăмăллăх акцийĕ иртет. Чăваш чĕлхи кунне халалласа акции ирттерес шухăша Чăваш Республикин Патшалăх Канашĕн Председателĕ Альбина Егорова пĕлтернĕ.

Чăваш чĕлхин кунне чăвашсене çутта кăлараканĕн Иван Яковлевич Яковлевăн çуралнă кунĕнче, апрелĕн 25-мĕшĕнче, паллă тăваççĕ.

Чăваш чĕлхи пуласлăхĕшĕн пăшăрханакансене ача садне çÿрекенсене, шкул ачисене, нумай ачаллă çемьере ÿсекен ачасене акции шайĕнче чăвашла кĕнекесем парнелеме йыхравлаççĕ.

Ĕнер Альбина Егорова ыр кăмăллăх акцийĕпе Кăшавăш шкулĕнче пулчĕ.

«Тăван ен», № 13 (10743-10744).

11.04.2019.