14 июня 2023

Чăваш кĕнеке издательствин тĕп редактор çумĕ Ольга Федорова Чăваш наци радиовĕпе ĕнер Светлана Асамат ертсе пыракан «САС» кăларăмăн хăни пулчĕ.

 

Калаçу Мускавра нумаях пулмасть иртнĕ «Хĕрлĕ тÿрем» кĕнеке фестивалĕ тавра йĕркеленчĕ. Кăçал вăл тăххăрмĕш хут иртрĕ, Чăваш кĕнеке издательстви те унта хутшăнчĕ.
Ольга Федорова каласа панинчен:
– «Хĕрлĕ тÿрем» кĕнеке фестивальĕнче Раççейĕн тĕрлĕ регионĕнчи издательствăсем, кĕнеке сутакан организацисем хăйсен кăларăмĕсемпе паллаштараççĕ. Ĕçтешсем пĕр-пĕринпе хутшăнаççĕ, тĕрлĕ ыйтăва сÿтсе яваççĕ. Кăçал уява 60 яхăн регионтан килсе çитрĕç, пирвайхи хут унта Донецк, Херсон, Луганск облаçĕсем тата Запорожье хутшăнчĕç.
Чăваш кĕнеке издательстви уява 150 тĕрлĕ кăларăм, 600 ытла кĕнеке илсе кайрĕ. Чăваш тĕррипе паллаштаракан альбомсене пĕрремĕш куннех туянса пĕтерчĕç. Чылайăшĕ пирĕн халăх историйĕпе, йăли-йĕркипе интересленни сисĕнчĕ. Чăваш апат-çимĕçне хатĕрлеме вĕрентекен кăларăмсене уйрăмах ыйтрĕç. Ÿнерçĕсен кĕнеке-альбомĕсене те кăмăлласа йышăнчĕç, чылайăшĕ Станислав Юхтар, Праски Витти, Геннадий Козлов ĕçĕсемпе интересленчĕ, кĕнекесемпе паллашнă май Чăваш ене килсе курас ĕмĕтлисем те пулчĕç.
«Хĕрлĕ тÿрем» кĕнеке фестивалĕнче издательствăсемшĕн чи пĕлтерĕшли – Раççей кĕнекеçисен ассоциацийĕ – АСКИ – «Çулталăкри чи лайăх кĕнеке» конкурсăн çĕнтерÿçисене чыслани. Чăваш кĕнеке издательствинче кун çути курнă Юрий Васильевăн «Энциклопедия музыкально-театрального искусства Чувашии» энциклопеди 520 кăларăм хушшинче дипломант пулса тăни савăнтарчĕ.
Ку çеç те мар. Уяв уçăлнă кунне пирĕн пата Раççей кĕнекеçисен ассоциацийĕн вице-президенчĕ Олег Васильевич Филимонов пычĕ, Геннадий Иванов-Орков хатĕрленĕ «Золотая игла Марии Симаковой» кăларăмшăн кĕмĕл диплом, тав хучĕсем парса чысларĕ.

Сăн ÿкерчĕкре (сулахайран сылтăмалла):
Ольга Федорова, "САС" кăларăм хăни;
Виктор Дмитриев, Чăваш наци радиовĕн продюсорĕ;
Светлана Асамат, "САС" кăларăм авторĕ тата ертÿçи.