19 апреля 2019

Республикăри çамрăк авторсен «Çĕнĕ ятсем уçатпăр» VII литература конкурсĕ вĕçленчĕ. Ăна чăвашсене çутта кăлараканĕ, педагогĕ Иван Яковлев çуралнăранпа 170 çул çитнине халалласа Чăваш Республикинчи ачасемпе çамрăксен библиотеки йĕркелесе ирттерчĕ.
Конкурс учредителĕсем Чăваш Республикин Культура, национальноçсен ĕçĕсен тата архив ĕçĕн министерствипе Чăваш Республикин Профессионал писательсен союзĕ пулчĕç.
«Çĕнĕ ятсем уçатпăр» конкурса республикăри 10 районпа 4 хулари 34 участникран 46 ĕç килнĕ. Вĕсем ‒ Элĕк, Патăрьел, Вăрнар, Йĕпреç, Канаш, Куславкка, Вăрмар, Çĕрпÿ, Шупашкар, Тăвай районĕсенчен, Канаш, Çĕнĕ Шупашкар, Шупашкар, Çĕмĕрле хулисенчен.
Конкурс виçĕ номинаципе иртнĕ: проза, поэзи, драматурги. Вĕсенчен кашнине чăваш е вырăс чĕлхипе çырнă ĕçсем тăратма сĕннĕ. Ĕçсем пуринчен те ытларах «Поэзия» жанрпа килнĕ ‒ 61 процент, «Проза» жанрпа ‒ 30 процент, «Драматурги» ‒ 9 процент.
Конкурса килнĕ ĕçсене сумлă жюри хакланă. Вĕсен шутĕнче ‒ чăвашсен паллă писателĕсемпе поэчĕсем, журналисчĕсем, куçаруçисемпе драматургĕсем: Раиса Сарпи, Ольга Тургай, Марина Карягина, Дмитрий Суслин, Лидия Михайлова тата Культура министерствин профессилле искусство, вĕрентÿ тата халăх пултарулăхĕн пайĕн пуçлăхĕ Инна Ильина.
Жюри членĕсем çамрăк çынсем патриотизм, çемье тата ăс-тăн пуянлăхĕн темине ытларах çутатса панине палăртнă. Конкурса килнĕ произведенисем çавăн пекех пĕр-пĕрин хушшинчи тата çамрăксемпе аслă ăрури çынсем хушшинчи хутшăну ыйтăвĕсене те çĕклеççĕ.
Конкурс çĕнтерÿçисен шутĕнче Куславкка районĕнче пурăнакан 26 çулхи Олеся Владимировна Михайлова та пур. Унăн чăвашла çырнă «Çемье телейĕ» сăвви «Поэзи» номинацире 22-30 çулхи çынсем хушшинче çĕнтерÿçĕ пулса тăнă, «Йĕлтĕр йĕрĕ» вара хавхалантармалли парнене тивĕçнĕ.
Республикăри çамрăк авторсен «Çĕнĕ ятсем уçатпăр» литература конкурсĕн çĕнтерÿçисемпе унта хутшăннисене савăнăçлă лару-тăрура наградăлама апрелĕн 23-мĕшĕнче 12 сехет тĕлне Шупашкар хулинчи Иван Яковлев проспектĕнчи 8а çуртра вырнаçнă Чăваш Республикин ачасемпе çамрăксен библиотекине пыма чĕнеççĕ.
Конкурс участникĕсен чи лайăх произведенийĕсене «Çĕнĕ ятсем уçатпăр» литература пуххин пиллĕкмĕш кăларăмне кĕртĕç.
Чăваш Республикин Культура,
национальноçсен ĕçĕсен тата
архив ĕçĕн министерстви.
«Ялав», Куславкка район хаçачĕ, № 15(9973).
19.04.2019.