19 апреля 2019

Энтри Пасар библиотекинче ĕçлекен Л. Шикарева тăрăшнипе ялти вăтам шкулта чăвашсен паллă поэчĕпе тата прозаикĕпе, Чăваш Республикин культурăн тава тивĕçлĕ ĕçченĕпе, Çеçпĕл Мишши премийĕн лауреачĕпе Николай Ишентейпе ‒ Николай Петрович Петровпа ‒ тĕлпулу йĕркеленĕ.
Вăл ‒ сăвăсемпе интереслĕ калавсенчен, повеçсенчен тăракан 20 ытла кĕнеке авторĕ. Вĕсене ачасене те, çитĕннĕ çынсене те халалланă. Çав кĕнекесенче ыркăмăллăх, йăла-йĕркене, ăс-тăн хаклăхне упрасси çинчен сăмах пырать.
Тĕлпулу вăхăтĕнче Николай Петрович 1-5-мĕш классенче вĕренекенсене тата учительсене хăйĕн пултарулăхĕпе, «Ачаш кулăш вăрттăнлăхĕ» кĕнекипе паллаштарнă, çавăн пекех хăй çырнă темиçе юптарăвне каласа кăтартнă. Çак кăларăм «Литературăллă Чăваш Ен: 2017 çулхи пуринчен нумайрах вулакан кĕнеке» списока лекнĕ пулнă.
Шкул ачисем писатель, сăвăç каласа панине питĕ тимлĕ итленĕ, хăйсене хумхантаракан ыйтусене панă. Вĕсене нумайăшĕ интереслентернĕ: пĕрремĕш сăввине хăçан çырнă, вăл мĕн ятлă пулнă, мĕншĕн çакнашкал хушма ят суйласа илнĕ тата ытти те.
А. ТУРГАНОВА.
«Ялав», Куславкка район хаçачĕ, № 15(9973).
19.04.2019.