23 августа 2019

Чăваш кĕнеке издательствин Шупашкар хулинчи Новогородская урамĕнчи 34-мĕш çуртра вырнаçнă кĕнеке магазинĕнче ачасем валли «Эпĕ чăваш тумне ÿкеретĕп» мастер-класс ирттернĕ. Унăн тĕллевĕ — çитĕнсе пыракан ăрăва чăваш халăхĕн историйĕпе культурине тимлеме вĕрентесси. Ĕçре Елена Еньккан «Чăваш кĕпе-тумтирĕ» кĕнекепе усă курнă. Ăна Чăваш кĕнеке издательствинче 2017 тата 2018 çулсенче пичетлесе кăларнă.
Чăваш халăх тумĕ тĕрлĕрен эрешсемпе пуян пулнă. Вĕсене час-часах хĕрес, виçкĕтеслĕх, ромб, тÿркĕтеслĕх, кукăр-макăр йĕр, тÿрĕ йĕр евĕр тĕрлесе тунă. Эрешсем çынсен, кайăксен, чĕрчунсен кÿлеписене аса илтернĕ. Вĕсене кĕпесем, туй тутрисем, качча каякан хĕрĕн пĕркенчĕкĕсем тата ытти тум çине тĕрленĕ. Кĕпи-тумĕ ялан тенĕ пекех шурă тĕслĕ пулнă, ытларах хĕрлĕ, хура тĕссемпе усă курнă, каярахпа кăштах кăвак, сарă, симĕс тĕссем хушнă. Вăхăт иртнĕçемĕн чăваш тумĕ çинчи тĕрĕ тĕсĕсем анлăланса кайнă. Çакăн çинчен ача-пăча литературин пайĕн ертсе пыракан редакторĕ Ольга Федорова ăнланмалла каласа пачĕ. Вăл çавăн пекех ачасене ĕçлеме çăмăлрах пултăр тесе Е.Жачеван «Чăваш тĕрри» кĕнекинчи илемлĕ ÿкерчĕксене кăтартрĕ.
Çамрăк художниксем задание тăрăшсах пурнăçларĕç. Вĕсем Акăшпипе Арспулат, Мерченпипе унăн хĕрĕсен Телейпипе Хĕрпикен, Шехрустанăпа Талмăрсан тумĕсене сăрласа илемлетрĕç. Шурă-хура картинăсем куç умĕнчех хитре ÿкерчĕксем пулса тăчĕç. Жюри членĕсем — магазин ĕçченĕсем — пĕтĕм ĕçе лайăх хак пачĕç, кашни ача Чăваш кĕнеке издательствин парнине тивĕçрĕ. Магазинта тÿрех ÿкерчĕксен куравне йĕркелерĕç. Магазин заведующийĕ О.Филиппова ачасемпе вĕсен ашшĕ-амăшĕсене мастер-класа активлă хутшăннăшăн тав турĕ, Чăваш кĕнеке издательстви малашне те тĕрлĕрен тематикăллă мероприятисем ирттерме палăртнине пĕлтерчĕ.
О.ИВАНОВА.
«Ялав», Куславкка районĕн хаçачĕ, № 33(9991).
23.08.2019.