12 апреля 2019

Чăваш Республикин Патшалăх Канашĕн пуçарăвĕпе апрелĕн 10-25-мĕшĕсенче пуçласа «Ачана чăвашла кĕнеке парнеле» ыркăмăллăх акцийĕ ирттереççĕ.
Чăваш чĕлхи кунне халалланă çак ыркăмăллăх акцине ирттерес пирки ЧР Патшалăх Канашĕн председателĕ Альбина Егорова пуçару тунă. Аса илтеретпĕр, чăваш чĕлхи кунне çуллен апрелĕн 25-мĕшĕнче чăваш халăхĕн аслă вĕрентÿçи Иван Яковлевич Яковлев çуралнă кун паллă тăваççĕ.
«Паян эпир çемьере ашшĕпе амăшĕ иккĕшĕ те чăвашла пĕлнĕ çĕртех ачисем чăвашла калаçманнине тĕл пулатпăр. Чăваш Енре пурăнакан халăхăн 67 процентне яхăн ‒ чăвашсем. Тăван чĕлхене, хамăрăн йăла-йĕркепе культурăна упраса хăвармалли майсенчен пĕри вăл ‒ хамăрăн ачасене чăвашла калаçма вĕрентни, вĕсене чăвашла кĕнекесем вуласа пани», ‒ тенĕ Альбина Егорова.
«Ачана чăвашла кĕнеке парнеле» акци пынă вăхăтра Чăваш Ен Патшалăх Канашĕн депутачĕсем чăваш чĕлхи шăпишĕн тимлекенсене пурне те шкулчченхи вĕренÿ учрежденийĕсенче, шкулсенче, нумай ачаллă çемьесенче воспитани илекен ачасене чăвашла кĕнеке парнелеме сĕнеççĕ. Çак пархатарлă ĕçе вырăнти депутатсем, чиновниксем тата ытти çынсем те хастар хутшăнасса шанса тăраççĕ. Чăваш чĕлхи упранаслăхĕ, вăл аталанса пырасси ‒ пĕтĕмпех хамăртан тата пуласлăх калчисенчен ‒ ачасенчен ‒ килет.
«Ял ĕçченĕ», Тăвай район хаçачĕ, № 14(10449).
12.04.2019.