12 апреля 2021

Ака уйăхĕн 10-25-мĕшĕсенче Чăваш Республикин Патшалăх Канашĕн пуçарăвĕпе пирвайхи хут «Ачана чăвашла кĕнеке парнеле» ыркăмăллăх акцийĕ иртет.
Чăваш чĕлхи кунне халалласа иртекен çак акцие Чăваш Республикин Патшалăх Канашĕн председателĕ А. Егорова ырланă.
Аса илтеретпĕр, Чăваш чĕлхин кунне чăвашсен çĕнĕ çырулăхне йĕркелесе янă И.Я. Яковлев çуралнă кун ‒ ака уйăхĕн 25-мĕшĕнче ‒ паллă тăваççĕ.
«Паян чылай çемьере ашшĕ-амăшĕ чăвашла пĕлеççĕ пулсан та, вĕсен ачисем пачах та тăван чĕлхепе калаçмаççĕ. Чăваш Енре пурăнакансенчен 67% ‒ чăвашсем. Çавăнпа та чăваш чĕлхине, йăли-йĕркине сыхласа хăварас тесессĕн пирĕн хамăрăн ачасене чăвашла калаçма, кĕнеке вулама вĕрентмелле», ‒ палăртать А. Егорова.
Асăннă акцине хутшăнса Чăваш Республикин Патшалăх Канашĕн депутачĕсем чăваш чĕлхине юратакансене, шкул çулне çитмен ачасен учрежденийĕсене, шкулсене, нумай ачаллă çемьери ачасене чăваш кĕнекине парнелеме йыхравлаççĕ.
«Ачана чăваш кĕнеки парнеле» ыркăмăллăх акцин информаци ĕçтешĕсем ‒ Чăваш Ен телерадиокомпанийĕ, «Чăваш Ен» ПТРК, «Советская Чувашия» хаçат, «Хыпар» Издательство çурчĕ».
«Ял пурнăçĕ», Красноармейски район хаçачĕ, № 26(9926).
12.04.2019.