27 ноября 2024

Пурте-пурте — Юрий Скворцов калавĕнчи Курак Мĕтрийĕ те, Ангелина Павловскаян Эльтуканĕ те, Елена Николаева новеллисенчи сăнарсем те, Рита Артин «Мемме» калавĕнчи Çеруш та, ытти авторсен геройĕсем те — ахаль çынсем. Çавăнпа вĕсен кун-çулĕ, ĕмĕчĕ-тĕллевĕ, хуйхи-суйхи вулакана уйрăмах çывăх тесе палăртрĕç «Хĕрĕх тĕслĕ хĕл» кĕнекен хăтлавне пуçтарăннисем.
Ку кăларăм — «Алран алла» ярăмра тухнă пиллĕкмĕш кĕнеке. Ăна чӳк уйăхĕн 26-мĕшĕнче Наци библиотекинче сӳтсе яврĕç. Ярăма Чăваш кĕнеке издательствин редакторĕ Галина Антонова тытса пырать, хăех пухса хатĕрлет, редакцилет.
Кăçалхи кĕнеке валли вунă çыравçăн произведенийĕсене суйласа илнĕ. Алена Аксупин «Аякри купăс сасси» калавĕ еплерех канăçсăрлăх хăварать чунра. Сăлтавĕ те паллă: калав геройĕ — ятарлă çар операцийĕнче. Денис Гордеевăн «Тĕрленĕ кĕпе» калавĕнчи Маниç аппана та шеллес килет: ӳссе çитнĕ ачисемпе амăшĕ хушшинчи чунлă çыхăну ытларах та ытларах татăлса пыни сисĕнет калавра. Хăвна пулăшнăшăн е инкекрен çăлнăшăн вăхăтра тав тăвайманни, кайран çакăншăн ӳкĕнсе пурăнни камăн кăна пулман-ши?.. Елен Нарпин геройĕ Алюш та кая юлать хăйне вилĕмрен çăлса хăварнă кинемие тав тума. Ача чух айван пулнă, кайран вăтаннă, вăхăт тупайман тата ытти сăлтавсем пулнă. Мĕншĕн хăратпăр-ши эпир çынна ăшă сăмах калама? Валентин Константиновăн «Çулăмри ӳкерчĕк» повеçĕ те нумайăшĕн чунне хускатнă. Митюкăн мăшăрĕ çемьеллĕ тепĕр арçынна чунтан юратса пăрахнă. Тӳрĕ чунлăскер, çакна вăл упăшкинчен пытармасть. Урине хăйĕн тата упăшкин ятне ямасса Митюк пĕлсе тăрать. Анчах мĕншĕн сивĕне пуçларĕ вĕсен халиччен ăшă тăнă йăви? Иккĕшĕ те чунтан асапланса çак ыйту хуравне шыраççĕ. Тав Турра, çемьене упраса хăвараççĕ вĕсем. Петр Маркинăн «Кашкăр ами» калавĕ (чăвашла Олег Кульев куçарнă) пысăках та мар, вуласа тухатăн та çапла шутлатăн: этемĕн тискер кайăкпа та этемлех пулмалла.
Шухăша яракан произведенисем татах та пур кĕнекере. Вулаканăн, паллах, хăйсене килĕшнĕ кĕнекен авторĕсемпе тĕл пулса калаçас килет. Вĕсен кăмăлне Наци библиотекинче уйăхсерен пухăнакан «Варкăш» клуб çырлахтарма тăрăшать. Хальхинче хăтлава кĕнеке авторĕсенчен тăваттăшĕ — Елен Нарпи, Ангелина Павловская, Елена Николаева, Марина Карягина — пыма май тупнă. Вĕсемсĕр пуçне Раиса Воробьева, Ольга Австрийская, Ольга Федорова, Мальвина Петрова, Станислав Сатур çыравçăсем, «Варкăш» клубăн ытти хастарĕсем калаçрĕç. Кĕнекери повеçпе калавсен, новеллăсен сăнарĕсене пĕрле пăхса тухнă май шухăшламалли, тавлашмалли çеç мар, кулмалли темĕн чухлех тупăнчĕ.

Галина МАТВЕЕВА
Ольга ИВАНОВĂН сăнӳкерчĕкĕсем

Видео