02 марта 2023

Пуш уйӑхӗн 1-мӗшӗнче Шупашкарта К.В. Иванов ячӗллӗ Литература музейӗнче «Ҫуркунне тата хӗрарӑмсем» ӳнер куравӗ уҫӑлчӗ, хӗрарӑм поэтсем хӑйсен сӑввисене вуларӗҫ.

Залра «Хĕрарăм куçĕ тĕсĕллĕ тĕнче» пултарулӑх ушкӑнӗн (ертÿçи – Светлана Кокель) 30 ытла ӗҫӗпе паллашма май пулчӗ. Портретсем, пейзажсем, натюрмортсем, тӗрлӗ техникӑра калӑпланӑскерсем, илемӗпе тӳрех тыткӑнлаҫҫӗ. Кураври кашни картина хӳхӗм, ҫутӑ, ырӑ. Вӗсенче пурнӑҫ тапса тӑрать. Хӗрарӑм поэтсем «картинӑсен ытамӗнче» сӑвӑсем вуларӗҫ, прозаиксем тухса калаҫрӗҫ. Анне, ҫуркунне, юрату, хавхалану ҫинчен чылай хайлав янӑрарӗ.
Ҫакӑн пек ҫурхи тӗлпулусем тахҫанах йӑлана кӗнӗ. Мероприятие Чăваш кĕнеке издательствин илемлĕ литература редакторĕ Ольга Иванова, çавăн пекех хастар авторсем – Улькка Эльмен, Лидия Сарине, Людмила Сачкова, Светлана Гордеева т. ыт. те – хутшӑнчĕç. Пултаруллӑ хӗрарӑм поэтсем сӑввисене хӑпартланса вуларĕç.
Пĕтĕм тĕнчери хĕрарăмсен кунĕ умĕн иртнĕ уявра çыравçăсемпе ÿнерçĕсем пĕр-пĕрне çуркунне çитнĕ ятпа саламларĕç. Тĕлпулăва Роза Степановăн тата Александр Речкинăн пултарулăх номерĕсем илемлетрĕç.

Ольга АВСТРИЙСКАЯ