30 октября 2024

Кăçал конкурса 300 ытла кăларăм хутшăнчĕ, республикăри вулавăшсенче тĕлпулусем, кĕнеке хăтлавĕсем, литература каçĕсем иртрĕç.
Уява пухăннă хăнасене Наци вулавăшĕн «Чăваш кĕнеки» центрĕн ертÿçи Галина Соловьева, Чăваш кĕнеке издательствин тĕп редакторĕн çумĕ тата Чăваш Республикин Профессиллĕ писательсен союзĕн пайташĕ Ольга Федорова саламларĕç. Тĕрлĕ номинацире çĕнтерÿçĕсен йышĕнче Чăваш кĕнеке издательствинче кун çути курнă кăларăмсем те пур:
«Ача-пăча валли çырнă чи лайăх кĕнеке» номинацире «Сказки народов Чувашии. Чăваш Енри халăхсен юмахĕсем» (пухса хатĕрлекенĕ – Ольга Васильева, чăвашла куçараканĕ – Ирина Кошкина) тата Нина Царыгинăн «Çил-тăманлă ĕмĕт» кĕнекесем мала тухрĕç. Ирина Кошкинăн «Уйăх юлташне çăлни» калав пуххийĕ ятарлă диплома тивĕçрĕ.
«Поэзи жанрĕпе çырнă чи лайăх кĕнеке» номинацире Галина Матвеевăн «Çил çинчи турат» кăларăмĕ çĕнтерчĕ. Мальвина Петровăн «Витĕр Çил», Лев Кадкинăн «Тихая гавань» сăвă пуххийĕ ятарлă дипломсем илчĕç.
«Тăван ен çинчен çырнă чи лайăх кĕнеке» номинацире «Вера Кузьмина» кĕнеке-альбом (пухса хатĕрлекенĕсем – Атнер Хусанкай, Сергей Журавлев, Владимир Степанов) мала тухрĕ. Ятарлă дипломсене «Чувашская быль Галины Изратовой» (авторĕ – Елена Енькка), «Театр – мой мир. Театр – манăн тĕнче. Художник Станислав Кошкин» (пухса хатĕрлекенĕ – Надежда Кириллова) тивĕçрĕç.
«Чи лайăх ăслăлăх кĕнеки» номинацире «Ыр-усал халапĕсем. Былички» (пухса хатĕрлекенĕсем – ЧПГИ ĕçченĕсем Галина Ильина, Елена Федотова, куçараканĕ – Алексей Леонтьев), «Петр Егоров – наш современник» (пухса хатĕрлекенĕ – Евгений Дмитриев) ятарлă дипломлă пулчĕç.
«Чи нумай вуланакан кĕнеке» номинацире Сергей Павловăн «Шăпчăк çĕрĕпех юрлать» романĕ мала тухрĕ.
«Чи илемлĕ кĕнеке» номинацире Ольга Васильевăн «Заповедные места Чувашии. Чăваш Енри управ вырăнсем» кĕнекен ÿнерçи Юлия Лутошкина ятарлă диплома тивĕçрĕ.
Çĕнтерÿçĕсене, дипломантсене чун-чĕререн саламлатпăр, çирĕп сывлăх, хавхалану сунатпăр!

Çĕнтерÿçĕсен тулли списокĕпе Чăваш Республикин Наци вулавăшĕн сайтĕнче паллашма пулать.