Нарăсăн 22-мĕшĕнче Чăваш наци библиотекинче Владимир Степановăн «Великие битвы наших предков. Пирĕн несĕлсен аслă вăрçисем» истори очеркĕсен пуххийĕн хăтлавĕ иртрĕ. Вăл Чăваш кĕнеке издательствинче 2021 çул вĕçĕнче тухнă.
Презентацире халăх йышлăччĕ. Çĕнĕ кăларăма пахаланине ӳкерме Чăваш телевиденийĕ те кăмăл турĕ. Шел те, кĕнекене вуласа тухнисем иккĕн çеçчĕ залра: авторĕ хăй тата редакторĕ. Кăларăмпа паллашма шантарнисем е килсе çитеймен, е очерксен пуххине шĕкĕлчеме ĕлкĕреймен иккен. Историксем те çукчĕ. Вĕсен хаклавне питĕ илтесшĕнччĕ Марина Карягина тележурналист тата çыравçă. Ку ыйту ыттисене те кăсăклантарчĕ.
Владимир Васильевич кĕнеке çинчен туллин каласа пачĕ: «Раççей халăхĕсен йышĕнче чăвашсем хăйсен пуян историйĕпе палăрса тăраççĕ, вĕсен культуринче авалхи Китай, Иран, Месопотами истори йĕрĕсем – куç тулли. Анчах та халăхăн историпе культура эткерне эпир халĕ те кирлĕ таран çутатман-ха, хакламан-ха... Кĕнекене аслă ӳсĕмри шкул ачисем тата студентсем валли çырнă. Тематика кăсăклăхĕ вара – кĕнекере шкул учебникĕсенче питех шута илмен е пачах тимлемен самантсене çутатса панинче. Вĕсем çинчен çитĕннисем те питех пĕлмеççĕ. Çавăнпа ĕнтĕ çак кĕнеке историпе интересленекенсемшĕн пур енĕпе те илĕртӳллĕ. Тĕрленчĕксенче тĕлĕнтермĕш шырани, фактсене шăв-шавлăн урăхла ăнлантарни çук. Кăларăмра килĕшнĕ-йышăннă фактсемпе усă курнă, вĕсене тĕпе хурса тăван халăхăн нумай ĕмĕрлĕ истори çул-йĕрĕн чуна тыткăнлакан саманчĕсене çутатнă».
Ольга Иванова редактор та сăмах илчĕ: «Чăваш кĕнеке издательствин кăларăмĕсем тĕрлĕ ярăмпа пичетленеççĕ: «Кивелми кĕнеке» (Нестареющая книга), «Алран алла» (Из рук в руки), «Чăваш Енĕн чаплă çыннисем» (Замечательные люди Чувашии) т. ыт. те. Нумаях пулмасть ку список çĕнĕ ятпа пуянланчĕ – «Кăсăклă теçетке» (Занимательная десятка). Владимир Степановăн «Великие битвы наших предков. Пирĕн несĕлсен аслă вăрçисем» кĕнеки шăпах çак ярăмпа тухрĕ ĕнтĕ. Авторпа килĕштерсе ĕçлерĕмĕр, мĕнле-тĕр ыйту сиксе тухсан ăна çийĕнчех татса параттăмăр, Владимир Васильевич йăлт тĕплĕн ăнлантаратчĕ, уçăмлататчĕ».
Мероприяти тăршшĕпе ытларах Владимир Степановăн калаçма тиврĕ. Хăтлава хутшăннисем вăл хĕмленсе те хăпартланса пупленине итленипе хавхаланса кайсан, кĕнекене туянса е вулавăшран илсе вуласан тем пекехчĕ.

Ольга АВСТРИЙСКАЯ.
Автор сăнӳкерчĕкĕсем.