22 января 2026

Денис ГОРДЕЕВ, чăваш халăх писателĕ: – Кăрлач уйăхĕн 25-мĕшĕнче Раççейре Студентсен кунне паллă тăваççĕ. Уяв çывхарнă май çыравçăсене аса илÿ ытамне путма сĕнтĕмĕр.

– Çар хĕсметĕнчен таврăнсан эпĕ Чăваш патшалăх педагогика институтне çул тытрăм. Мана вырăс литературипе çеç экзамен тыттарчĕç, тÿрех пиллĕкмĕш курса вĕренме илчĕç.
Паянхи пек астăватăп: чи лайăх вĕренекенсем, отличниксем, экзамен параймасăр каялла тухрĕç. Акă эпир Петĕр Эйзинпа иксĕмĕр кĕтĕмĕр. Элла Абрамовна Бройтман преподаватель манран çапла ыйтать: «Маяковскин Есенина халалласа çырнă сăввине пĕлетĕн-и?» – тет.
Эпĕ вуласа патăм. Çурринчен иртсен вăл Петĕр Эйзина малалла вулама хушрĕ. Иксĕмĕр икĕ сехет сăвă вуларăмăр...